అన్నమాచార్య కీర్తన - కట్టెదుర వైకుంఠము
కట్టెదుర వైకుంఠము కాణాచయినా కొండ
తెట్టెలాయ మహిమలే తిరుమలకొండ//
వేదములే శిలలై వెలసినది కొండ
యేదెస బుణ్యరాసులే యేరులైనది కొండ
గాదిలి బ్రహ్మాదిలోకముల కొనల కొండ
శ్రీదేవుడుండేటి శేషాద్రి యీ కొండ
సర్వదేవతలు మృగజాతువులై చరించే కొండ
నిర్వహించి జలధులే నిట్టచరులైన కొండ
వుర్విదపసలే తరువులై నిలిచిన కొండ
పూర్వపు టంజనాద్రి యీ పొడవాటి కొండ
వరములు కొటారుగా వక్కాణించి పెంచేకొండ
పరుగు లక్ష్మికాంతు సోబనపు గొండ
కురిసి సంపదలెల్ల గుహలనిండిన కొండ
విరివైన దిదివో శ్రీ వేంకటపు గొండ
అర్థము : కట్టెదుట కనిపించే వైకుంఠమే ఈ వేంకటాచలం. ఇక్కడి తేనెతెట్టెలన్నీ మహిమలే! వేదాలే శిలలై వెలుగుతున్నాయి ఇక్కడ. బ్రహ్మాదిలోకాలకు చివరిది ఈ కొండ. శ్రీదేవుడుండేది శేషాద్రి ఈ కొండ. సకలదేవతలు మృగజాతులై సంచరిస్తారిక్కడ! సముద్రాలే సానువులయింది - ఈ కొండ. మునుపటి అంజనాద్రే ఈ పొడవైన కొండ. వరాలు అధికంగా పెంచేదీ కొండ. లక్ష్మి కాంతుని సుఖాలకు నిలయం - ఈ కొండ. సంపదలు పుష్కలముగా ఉండే గుహలు - ఈ కొండ. చాలా విశాలమైనది - ఈ కొండ.
No comments:
Post a Comment