అన్నమాచార్య కీర్తన - కొమ్మలాలా ఎంతవాడె గోవిందరాజు
కొమ్మలాలా ఎంతవాడె గోవిందరాజు
కుమ్మరించే రాజసమే గోవిందరాజు //
ఉలిపచ్చి నవ్వులతో ఒత్తిగిలి పవళించి
కొలువు సేయించుకొనీ గోవిందరాజు
జలజాక్షు లిద్దరును సరిపాదా లొత్తగాను
కొలదిమీర మెచ్చేని గోవిందరాజు //
అదె నాభికమలాన అజుని పుట్టించి తాను
కొదలేక వున్నవాడు గోవిందరాజు
చెదరక తన వద్ద సేవ సేసే సతులకు
గుదిగుచ్చే వలపులు గోవిందరాజు //
ఒప్పుగా వామకరము ఒగిచాచి వలకేల
కొప్పు కడునెత్తినాడు గోవిందరాజు
ఇప్పుడు శ్రీ వెంకటాద్రి నిరవై శంఖు చక్రాలు
కుప్పె కటారము బట్టె గోవిందరాజు //(సంపుటం 7 - సంకీర్తన 470)
భావము : ఈ సంకీర్తనలో అన్నమయ్య తిరుమల కొండ దిగువన ఉన్న తిరుపతి పట్టణంలో ఉన్న శ్రీ గోవిందరాజస్వామివారిని వర్ణిస్తున్నాడు. ఘనరాజసం ఉట్టిపడేటట్లు గోవిందరాజస్వామి శయనించి ఉన్నాడు. దేవేరులిరువురు స్వామివారి పాదాలు ఒత్తుతూ ఉండగా స్వామి కొలువు చేశాడని అన్నమయ్య అనేక విశేషాలతో శ్రీ గోవిందరాజస్వామిని సంకీర్తించాడు.
No comments:
Post a Comment