తెలుగు వ్యాకరణము - మొదటి ప్రకరణము - భాష
భాష అనగా నేమి? ఒకరి అభిప్రాయమును ఇంకొకరు తెలుసుకొనుటకై జనులు ఏర్పరుచుకున్న గుర్తులను "భాష" అందురు. ఉదా: తెలుగు, హిందీ, ఇంగ్లీషు, తమిళం, కన్నడం మొదలైన భాషలు |
నాగరిక - అనాగరిక భాషలు అనగా నేమి? లిఖిత రూపము కలిగి, సాహిత్యము కూడా కలిగి యున్న భాషలను "నాగరిక భాషలు" అందురు. కేవలము భాషిత రూపమునే కలిగి యున్న భాషలను "అనాగరిక భాషలు" అని అందురు. |
మన భాషకు తెలుఁగు - తెనుఁగు ఆంధ్రము అను పేర్లు ఎట్లు వచ్చినవి? శ్రీశైలము, కాళేశ్వరం, దాక్షారామము అను 3 శివక్షేత్రములను కలిగియున్న రాష్ట్రము అగుట వలన మన రాష్ట్రమునకు పూర్వము 'త్రిలింగదేశము' అను పేరు కలిగినది. ఈ 'త్రిలింగ' శబ్దము వికృతి పొంది 'తెలుఁగు' గా మారినదనీ, ఆ విధముగా ఈ రాష్ట్రమునకు తెలుగు దేశమని, ఇక్కడి ప్రజలు మాట్లాడు భాషకు తెలుఁగు భాషయని పేరు వచ్చినది. తెలుగులో న - ల లు పరస్పరము మార్పు చెందుట సహజము. ఉదా : మునగ - ములగ, మునుగుట - ములుగుట. ఆ విధముగా 'ల' కారము స్థానములో 'న' కారము వచ్చుట వలన తెలుఁగు - తెనుఁగుగా మారినది. ఇది ఒక అభిప్రాయము మరియొక అభిప్రాయము ప్రకారము దక్షిణ దిక్కును సూచించు 'తెన్' అను పదము నుండి 'తెనుఁగు' శబ్దము ఏర్పడినది. న - ల లు పరస్పరము మార్పు చెందుట వలన 'తెనుఁగు' నుండి 'తెలుఁగు' ఏర్పడినది. ఉత్తరదిశ నుండి వచ్చిన ఆంధ్ర రాజులు పరిపాలించుట వలన మన రాష్ట్రమునకు 'ఆంధ్ర దేశమని'', మన భాషకు 'ఆంధ్రమని' పేర్లు వచ్చినవి. ఈ విధముగా మన భాష తెలుఁగు - తెనుఁగు - ఆంధ్రము అను 3 పేర్లతో వ్యవహరింపబడుచున్నది. |
వ్యావహారిక భాష అనగా నేమి? ప్రజల దైనందిన వ్యవహారంలో నున్న భాషను "వ్యావహారిక భాష" అంటారు. |
గ్రాంథిక భాష అనగా నేమి? ప్రాచీన గ్రంథముల యందలి భాషను "గ్రాంధిక భాష" అందురు. ఇది ప్రాచీన గ్రంథాలలోని సూత్రాలకు అనుగుణముగా ఉండును. |
సరళ గ్రాంథిక భాష అనగా నేమి?ప్రాచీన గ్రంథాలలో నున్న ప్రాచీన గ్రాంథిక భాష ను నేటి పరిస్థితులకనుగుణముగా సరళీకరించగా ఏర్పడిన భాషను "సరళ గ్రాంథిక భాష" అంటారు. |
శిష్ట వ్యావహారిక భాష అనగా నేమి? శిష్టులు అనగా చదువు కొన్నవారి(పండితుల) వ్యవహారంలో నున్న భాషను "శిష్ట వ్యావహారిక భాష" అంటారు. నేడు గ్రంథాలలో, వార్తాపత్రికలలో, రేడియో టెలివిజనులలో, ఈ భాష విరివిగా వాడబడుచున్నది. దీనినే "ఆధునిక ప్రామాణిక భాష" అని కూడా అంటారు. |
No comments:
Post a Comment